Hdyž Thunderbird e-mejlowe konto přidawaće, móžeće so mjez IMAP (zdalene rjadowaki) a POP3 (e-mejl lokalnje na wašim ličaku) rozsudźić. IMAP a POP3 stej rozdźělnej metodźe (husto protokolej mjenowanej) za přistup k wašej e-mejli.

• IMAP: Powěsće a rjadowaki na wašim serwerje wostawaja. Změny w Thunderbird so na serwerje špiheluja, a změny na serwerje so w Thunderbird špiheluja.
• POP3: Nowe dochadźace powěsće su w dochadźe pósta (jendź. inbox) na serwerje. Thunderbird je sćahuje, zo by je na wašim ličaku składował, a Thunderbird je hnydom ze serwera wotstronja, chibazo wuběraće druhe nastajenje w serwerowych nastajenjach Thunderbird za swoje konto.

Poručamy IMAP wužiwać.

Na čo dyrbiće dźiwać?

Zo byšće sej rozsudźenje wosnadnił, wotmołwće na slědowace prašenja:

• Chceće přistup ke kontu z wjace hač jednoho grata? Wubjerće IMAP.
• Chceće přistup ke kontu z webwohladowaka? Wubjerće IMAP.
• Podpěruje waš e-mejlowy poskićowar IMAP abo POP3? Najwjace e-mejlowych poskićowarjow wobě metodźe podpěruje, přepruwujće wšak najprjedy.
• Što je maksimalna wulkosć wašeho póstoweho facha? Najwjace e-mejlowych poskićowarjow wjace hač dosć składowanskeho ruma skići, zo bychu wšitko na serwerje wobchowali, ale jeli chceće wjace hač 15 GB składować, wubjerće POP3.
• Funguje waš zwisk w normalnej padźe z wysokej latencu abo je nimoměry drohi (na přikład přez satelit) abo maće jenož zrědka internetny zwisk? Wubjerće POP3.

Što je IMAP a što je POP3?

IMAP

IMAP za Internet Mail Access Protocol steji, kotryž je moderniši hač POP3. Je dwusměrowy protokol, kotryž wašu e-mejl wot zdaleneho serwera do Thunderbird kopěruje, mjeztym zo originalna kopija na zdalenym serwerje wostawa. Změny na tutych e-mejlowych powěsćach, kaž markěrowanje jako přečitane, přidawanje a wotstronjenje markow abo značkow, abo přesuwanje do druheho rjadowaka budu so na zdalenym serwerje špihelować.

Mejlki, kotrež su so do Thunderbird ze zdaleneho serwera sćahnyli, su za wužiwanje w Thunderbird k dispoziciji, hdyž internetny zwisk njeje. Změny, kotrež su so w Thunderbird přewjedli, mjeztym zo internetny zwisk njeje, so ze zdalenym serwerom synchronizuja, hdyž so Thunderbird zaso z internetom zwjazuje.

Změny, kotrež so w Thunderbird přewjedu, so na wšěch gratach špihuluja, kotrež su přez IMAP zwjazane.

Zo byšće zhubjenje datow wobešoł, a snano tež z prawniskich přičinow, měł wy swój profil Thunderbird husto zawěsćić, hačrunjež waša e-mejl je na zdalenym serwerje składowana.

POP3

POP3 za Post Office Protocol (wersija 3) steji. Je jednosměrowy protokol, kotryž wašu e-mejl ze zdaleneho serwera do Thunderbird sćahuje a e-mejl ze zdaleneho serwera (po standardźe po 7 dnjach w Thunderbird) zhaša. Změny na tutych e-mejlowych powěsćach, na přikład markěrowanje jako přečitane abo přesuwanje do druheho rjadowaka, so na zdalenym serwerje nješpiheluja, ale so jenož na wašim lokalnym ličaku stawaja, hdźež Thunderbird běži.

Zo byšće so přećiwo zhubjenju datow škitał, a snano z prawniskich přičinow, měł wy swój profil Thunderbird husto zawěsćić, předewšěm, dokelž waša e-mejl so na zdalenym serwerje njeskładuje.

Waše konto změnić

Thunderbird tuchwilu móžnosć njeskići, zo by waše eksistowace IMAP-konto do POP3 abo nawopak konwertował. Zo byšće swoje konto do druheho protokola změnił, dyrbiće konto Thunderbird znowa přidać.

Hlejće Awtomatiska kontowa konfiguracija, zo byšće nowe e-mejlowe konto awtomatisce přidał abo Manuelna kontowa konfiguracija, zo byšće nowe e-mejlowe konto manuelnje konfigurował.