როგორ ავირჩიო მომწოდებელი გვერდითი ზოლიდან

შეეხეთ მბრწყინავ ნიშანს გვერდით ზოლზე. აირჩიეთ თანამოსაუბრის მომწოდებელი, რომ ვრცლად იხილოთ მის შესახებ. მიუთითეთ „გაგრძელება“, როცა მზად იქნებით. გახსოვდეთ, რომ მომწოდებლის შეცვლა ნებისმიერ დროს შეგიძლიათ.

როგორ შევცვალო თანამოსაუბრის მომწოდებლები

სხვადასხვა თანამოსაუბრეზე გადართვა ნებისმიერ დროს შეგეძლებათ, რამდენჯერაც მოგესურვებათ. მაგალითად, შეიძლება ერთი თანამოსაუბრე წერაში დასახმარებლად გერჩივნოთ და მეორე სურათების შესადგენად.

გვერდითი ზოლის ზემოთ აირჩიეთ თანამოსაუბრის დასახელება. შემდეგ იხილავთ ჩამოსაშლელს ყველა ხელმისაწვდომი თანამოსაუბრით. მიუთითეთ ერთ-ერთი ჩასანაცვლებლად.

როგორ მოვაცილო AI-თანამოსაუბრის მალსამობი Firefox-ის გვერდითი ზოლიდან

გვერდით ზოლზე გამოიყენეთ გამართვის ღილაკი . იხილეთ გვერდითი ზოლის მორგება, მოხსენით მონიშვნა AI-თანამოსაუბრეს Firefox-ხელსაწყოების არეში. მოგვიანებით კვლავ თუ მოისურვებთ გამოყენებას, შეგიძლიათ ისევ დააბრუნოთ მონიშვნა და მიჰყვეთ მითითებებს მომწოდებლის შესარჩევად.

ნაწერის მონიშვნა მოთხოვნების შემოსათავაზებლად

მოთხოვნები იგივე მითითებებია, რომელთაც აძლევთ თანამოსაუბრეს იმისდა მიხედვით, რა გსურთ გააკეთოს. წინასწარ ჩამოწერილი იქნება რამდენიმე მოთხოვნა, რომელთაც იხილავთ ტექსტის მონიშვნისას.

მოგვიანებითაც შეგიძლიათ გამოაჩინოთ მოთხოვნები:

• მონიშნულ ტექსტზე მარჯვენა წკაპით.
• მალსახმობით, რომელიც გამოჩნდება ტექსტის მონიშვნისას. (მისი დამალვაც შეგეძლებათ, თუ მოისურვებთ).

როცა აარჩევთ მოთხოვნას, Firefox გადაგზავნის მას მონიშნული ტექსტისა და გვერდის სათაურის თანხლებით შერჩეულ თანამოსაუბრესთან.

ყოველი შემოთავაზებული მოთხოვნა იწყება წინადადებით, რომელიც შეიცავს [ბრჭყალებში] გვერდის სათაურს და შერჩეულ ტექსტს. „ვიმყოფები გვერდზე [შესაბამისი სათაურით], მონიშნულია [შერჩეული ტექსტი]“. შემდეგ კი ერთვის რომელიმე ქვემოთ მოცემულიდან.

როგორ დავმალო მალსახმობი

ორი გზაა მალსახმობის დასამალად. ერთია, რომ უნდა მონიშნოთ ტექსტი და შემდეგ აირჩიოთ თანამოსაუბრის მალსახმობის დამალვა.

აგრეთვე შეგიძლიათ გახსნათ მენიუ და AI-თანამოსაუბრის არეში აირჩიოთ მალსახმობის დამალვა ტექსტის მონიშვნისას.

როგორ მუშაობს AI-თანამოსაუბრე?

AI-თანამოსაუბრე ეფუძნება ტექნოლოგიას, რომლითაც შესაძლებელია ტექსტისა და სურათების შედგენა, სახელწოდებით „შემოქმედებითი ხელოვნური ინტელექტი“ ან „მწარმოებელი ხელოვნური ინტელექტი“ (ინგლ. Generative AI – შემოკლებით „genAI“). ამ ტექნოლოგიას ჰაერიდან არ მოაქვს ტექსტი და სურათები. არამედ, გაწვრთნილია დიდი ოდენობის მონაცემებით.

როდესაც ურთიერთობთ შემოქმედებით ხელოვნურ ინტელექტთან, იგი იყენებს შესწავლილ მონაცემებს, რომ ივარაუდოს პასუხები ან სურათის შინაარსი. მონაცემები, რომლითაც გაიწვრთნა, აგრეთვე მითითებები, რომელიც შეგყავთ მის სამუშაო გარსში (ეგრეთ წოდებული „მოთხოვნები“, ინგლ. „prompts“), გავლენას ახდენს და განსაზღვრავს, რა როგორ წარმოიქმნება.

შემოქმედებითი ხელოვნური ინტელექტი ცდილობს გამოიცნოს და ივარაუდოს პასუხები – მაგრამ არაა გათვლილი და განკუთვნილი ზუსტი მოვლენების გადმოსაცემად. გამოტანილი ინფორმაცია შედგენილია თქვენი მოთხოვნისა და იმ მონაცემების მეშვეობით, რომლითაც გაიწვრთნილია ხელოვნური ინტელექტი. ყოველთვის კარგად უნდა გაიაზროთ, შეყვანილი მოთხოვნა იძლევა თუ არა პასუხად იმას, რასაც ეძებდით.

უკეთ რომ გაეცნოთ შემოქმედებით ხელოვნურ ინტელექტს, უთვალავი მასალა მოიპოვება ვებსივრცეში. აქვე შემოგთავაზებთ რამდენიმეს, რომლებიც გამოსადეგია დასაწყისისთვის (ინგლისური შინაარსით):

• Mozilla-ს სვეტი: როგორ მუშაობს ხელოვნური ინტელექტი სინამდვილეში?
• სტატია: როგორ იწერება შედეგიანი მოთხოვნა, MIT Sloan – ტექნოლოგიური მომსახურებები
• ვიდეო: შემოქმედებითი ხელოვნური ინტელექტის ახსნა სამხრეთ ავსტრალიის უნივერსიტეტისგან

ხშირად დასმული კითხვები

რა მონაცემებს უგზავნის Firefox მომწოდებელს, როცა მათ თანამოსაუბრეს ვიყენებ გვერდით ზოლზე?

როდესაც ხსნით თანამოსაუბრეს გვერდით ზოლზე, მომწოდებელი იმავე ინფრომაციას აგროვებს, რასაც შეაგროვებდა მის საიტზე რომ შესულიყავით ჩვეულებრივი ჩანართით Firefox-ში. როდესაც მონიშნავთ ტექსტს ვებგვერდზე ან PDF-ფაილში და აირჩევთ შემოთავაზებულ მოთხოვნას, მომწოდებელს გაეგზავნება მონიშნული ტექსტი, მოთხოვნა და გვერდის სათაური.

ხელოვნური ინტელექტის თანამოსაუბრეებით სარგებლობა უფასოა?

თანამოსაუბრის თითოეულ მომწოდებელს აქვს უფასოდ გამოყენების შესაძლებლობაც. ბევრს ფასიანიც ახლავს. უფასოს გამოყენებისას რაღაც შეზღუდვებია ხოლმე – მაგალითად, გარკვეული ოდენობის საუბრის წამოწყება დღეში ან შეტანილი მონაცემების მოცულობა თანამოსაუბრით სარგებლობისას.

სანდოა თანამოსაუბრისგან მოწოდებული ინფორმაცია?

ხელოვნური ინტელექტი მხოლოდ ნავარაუდევს იძლევა – იგი არაა გათვლილი და განკუთვნილი ზუსტი მოვლენების გადმოსაცემად. მის მიერ შედგენილი ინფორმაცია მხოლოდ შედეგია მოთხოვნისა და იმ მონაცემებისა, რომლითაცაა გაწვრთნილი, ამიტომ ხშირად შეიძლება შეცდეს. თანამოსაუბრის მიერ მოწოდებული მონაცემები აუცილებლად უნდა გადაამოწმოთ ხოლმე. იხილეთ ვრცლად, როგორ მუშაობს ხელოვნური ინტელექტის თაანამოსაუბრეები.

ზოგიერთი თანამოსაუბრე არაა ხელმისაწვდომი ჩემს მხარეში. რატომ მიგდებს ასარჩევად?

ყველა თანამოსაუბრე არაა ხელმისაწვდომი ყველა ქვეყანასა თუ მხარეში. არჩევისას შეზღუდვა არაა დაწესებული, ვინაიდან ხშირად იცვლება ხოლმე აღნიშნული ხელსაწყობის ხელმისაწვდომობა სხვადასხვა მხარეში.

თანამოსაუბრის მომწოდებელს შეუძლია იხილოს ჩემი საუბრები? როგორ ეპყრობა ჩემს მონაცემებს?

ეს დამოკიდებულია ხოლმე თანამოსაუბრესა და ზოგჯერ იმ პარამეტრებზე, რომლის არჩევის საშუალებაცაა. ზოგიერთ თანამოსაუბრეს გააჩნია „ვინაობის გაუმხელი“ რეჟიმი. სხვები შეიძლება საუბრის წაშლის საშუალებას გთავაზობდეთ.

დაწვრილებით, თუ როგორ ეპყრობა თითოეული მომწოდებელი თქვენს ნასაუბრებსა და მონაცემებს, გაეცანით მათი მომსახურების პირობებსა და პირადულობის დებულებებს მათსავე საიტებზე.

უსაფრთხოა პირადი მონაცემების გაზიარება თანამოსაუბრისთვის?

არაა სასურველი პირადი მონაცემების მიწოდება ამგვარი თანამოსაუბრეებისთვის.

Firefox თვალს ადევნებს ჩემს საუბრებს?

არაა. Firefox ვერ იხილავს თქვენს საუბარს, ვინაიდან არ აქვს წვდომა თანამოსაუბრისა და იმ საიტების შიგთავსთან, რომლიდან შერჩეულ ტექსტსაც უგზავნით მალსახმობის მეშვეობით ხელოვნურ ინტელექტს. მსგავსად სხვა შესაძლებლობებისა, მხოლოდ აღვრიცხავთ, თუ როგორ გამოიყენება ხოლმე AI-თანამოსაუბრე, რაც გვეხმარება გავაუმჯობესოთ Firefox. მაგალითად, გროვდება მონაცემები, თუ რაოდენ ხშირადაა არჩეული ესა თუ ის მომწოდებელი და რამდენად ხშირადაა გამოყენებული შემოთავაზებული მოთხოვნები. იხილეთ ვრცლად, თუ როგორ აღრიცხავს Firefox წარმადობისა და გამოყენების მონაცემებს, აზომვებს რომ ვუწოდებთ.

როგორ მოვაცილო Firefox-იდან?

გვერდით ზოლზე აირჩიეთ პარამეტრების ნიშანი . გვერდითი ზოლის მორგების არეში კი მოხსენით მონიშვნა AI-თანამოსაუბრეს Firefox-ხელსაწყოების განყოფილებიდან.