HTTP წარმოადგენს ვებსერვერიდან თქვენს ბრაუზერში ინფორმაციის გადაცემის სისტემას, ე.ი. როდესაც ეწვევით ვებგვერდს HTTP-ით, თქვენი კავშირი ღიაა თვალყურის დევნების მსურველთათვისა და ე.წ. „შუამავლის“ შეტევებისთვის. საიტების დიდი ნაწილი იყენებს HTTP-ს, ვინაიდან არ გადასცემს და არ იღებს მომხმარებლებისგან მნიშვნელოვან ან პირად ინფორმაციას და შესაბამისად არ საჭიროებს დაცულ კავშირს.
როდესაც თქვენ სტუმრობთ გვერდს, რომელიც სრულადაა გადაცემული HTTPS-ის საშუალებით, მაგალითად თქვენი ბანკის შემთხვევაში, დაინახავთ მწვანე საკეტის საკეტის ნიშანს მისამართების ველში (ვრცლად იხილეთ როგორ გავარკვიო, ვებსაიტთან ჩემი კავშირი დაცულია თუ არა?). რაც ნიშნავს, რომ თქვენი კავშირი დამოწმებული და დაშიფრულია, შესაბამისად დაცულია მეთვალყურეებისა და „შუამავლის“ შეტევებისგან.
თუმცაღა, თუ HTTPS გვერდი რომელსაც ეწვიეთ, შეიცავს HTTP შიგთავსსაც, HTTP ნაწილი შესაძლებელია იხილონ ან გარდაქმნან შემტევებმა, მიუხედავად იმისა, რომ მთავარი გვერდი HTTPS-ითაა გადაცემული. როდესაც HTTPS გვერდი შეიცავს HTTP შიგთავსს, ჩვენ მას ვუწოდებთ „შერეულს“. გვერდი რომელსაც სტუმრობთ, მხოლოდ ნაწილობრივაა დაშიფრული და მიუხედავად იმისა, რომ შესაძლოა ჩანდეს უსაფრთხოდ, ასე არაა. დამატებითი ინფორმაციისთვის, შერეული შიგთავსის (მოქმედისა და უმოქმედოს) შესახებ, იხილეთ სტატია ჩვენს სვეტზე.