HTTP je system za přenošowanje informacijow wot webserwera do wašeho wobhladowaka. HTTP wěsty njeje, jeli tuž stronu wopytujeće, kotraž so přez HTTP posłužuje, waš zwisk njeje škitany před wotposkowanjom a posrědnikowymi nadpadami (jendźelsce: Man-in-the-middle attacks). Najwjace websydłow so přez HTTP posłužuje, sensibelne daty wone njewuměnjeja a tohodla wěste zwiski trěbne njejsu.
Hdyž stronu wopytujeće, kotraž so dospołnje přez HTTPS přenošuje, kaž na přikład strona wašeje banki, budźeće zeleny zamk zamk w adresowym polu widźeć (hlejće Kak móžu zwěsćić, hač mój zwisk z websydłom je wěsty? za podrobnosće). To woznamjenja, zo so waš zwisk awtenfikuje a zaklučuje a so tohodla před woběmaj wotposkowarjomaj a před posrědnikowymi nadpadami škita.
Jeli wšak HTTPS-strona, kotruž wopytujeće, HTTP-wobsah wobsahuje, da so HTTP-dźěl wot nadpadnikow čitać abo změnić, byrnjež so hłowna strona přez HTTPS přenošowała. Hdyž HTTPS-strona ma HTTP-wobsah, mjenujemy tón wobsah “měšany”. Strona, kotruž wopytujeće, je jenož zdźěla zaklučowana a hačrunjež zda so wěsta być, wona to njeje. Za dalše informacije wo měšanym wobsahu (aktiwnym a pasiwnym), hlejće tutón blogowy nastawk.